Þorrablót

 

Þorrablót, já ekkert jafnast á við þorrablót   

að þenja kviðinn út af hrútspungum,

gallsúrum

þeir virka vel, neðan við nafla á þér

og sultuð svið

súrsaðar bringur, brauð og barinn harðfiskur

þú verður algjört æði af þessu lúxusfæði

ef þú borðar af því nóg.

(lag.sveitaball)

Var á þorrablóti á laugardaginn sem tókst í alla staði vel. Var reyndar í þorrablótsnefnd, en í henni voru 15 konur. Síðastliðið haust var byrjað á því að svíða hrútspunga og hausa í sviðasultu og sett í súr, ásamt bringukollum og lundaböggum? Um miðjan janúar voru rúgkökur og hveitikökur bakaðar.

Síðasta vika fór öll í undirbúnig á mat og skemmtiefni. Soðið var hangikjöt, búin til ný sviðasulta þá voru soðnar rófur í stöppu og kartöflur í mús. Annað sem var á boðstólum var harðfiskur, smjör og hákarl.

Ég setti spurningarmerki við lundabaggana, kann ekki alveg við nafnið á þessum nýtísku lundaböggum, upprúlluðum slögum. Ég man þegar mamma var að búa til lundabagga þá var notað í þá, hjörtu, hálsæðar, gollurshús og ristlamör og að síðustu var þindin saumuð utan um. Þetta þótti manni algert lostæti eða þá úttroðin vélindu, ég tala nú ekki um sviðnar lappir. Í dag er kvartað yfir því að unga fólkið borði ekki sláturafurðir. Er það ekki vegna þess að það hefur ekki fengið að kynnast þessu þar sem mjög erfitt er að nálgast þessar afurðir af hræðslu við eitthvert smit. Það verður að fara með þetta eins og mannsmorð ef maður nælir sér einhversstaðar í óverkaða punga eða lappir.

Vil ég að lokum þakka öllum konunum og öllu þeim sem aðstoðuðu okkur við undirbúnig þorrablótsins.